ಬಳೆಗಾರ

 

 #ಬಳೆಗಾರ

ಹಚ್ಚಹಸುರಿನ ಬಳೆಯ ಅಚ್ಚಕೆಂಬಳೆಯ
ಹೆಚ್ಚು ತಂದಿಹೆ ತಾಯೇ ಹೊರಗೆ ಬಾರೇ
ಅಚ್ಚುಮೆಚ್ಚಿನ ಚುಕ್ಕಿ ಗೀರಿನ ಬಳೆಯ
ಮೆಚ್ಚಿಕೊಳ್ಳುವಿ ತಾಯೇ ನೋಡು ಬಾರೇ||೧||

ರಂಗರಾಯರ ಮನಸ ಗೆದ್ದಿರುವ ಮಹಾತಾಯಿ
ಬಿಡಿಸಿಹೆನು ಅಂಗಳದಿ ಬಳೆಜೋಳಿಗೆ
ರಂಗುರಂಗಿನ ಬಳೆಯ ನಿಮಗಾಗಿ ತಂದಿಹೆನು
ತೊಡಿಸುವೆನು ಮೆದುವಾಗಿ ನಿಮ್ಮ ಕರಗಳಿಗೆ||೨||

ಮದುವೆಸೀಮಂತದಿ ಬೇಕು ಗಾಜಿನಬಳೆಗಳು
ಘಲ್ ಘಲ್ ಸದ್ದಿಗೆ ಮನದಿ ಉಲ್ಲಾಸ
ಇದುವೆ ಕಾರಣವಂತೆ ನಿದಿರೆ ಕದಿಯಲು ಸಖನ
ನಲ್ಲೆ ಮನಸಿನ ಒಳಗೆ ಬಲು ಸಂತಸ||೩||

ಹಿರಿಕಿರಿಯ ನಾರಿಯರೆ ಕೊಳ್ಳಿರಿ ಬಳೆಗಳನು
ಬಂಗಾರದ ಬಳೆಗಿಂತ ಮೆರುಗು
ಬರಿಗೈಯ ಯುವತಿಯರೆ ಬಿಳಿಗೈಯ ಬಾಲೆಯರೆ
ಸಿಂಗರಿಸಿ ನೋಡಿ ಕೈಗಳಿಗೆ ಸೊಬಗು||೪||

ಇತ್ತಿತ್ತ ಮರೆತಿಹರು ಬಳೆಶಾಸ್ತ್ರ ಸಂಸ್ಕ್ರತಿಯ
ಮುತ್ತೈದೆ ಬಾಳಿಗಿದು ಸಿರಿಯು ಹೆಣ್ಣೇ
ಹತ್ತೂರ ಸುತ್ತಿ ಮುಂದೆ ಸಾಗುವೆ ನಾನು
ಮತ್ತೆ ಬರುವುದು ಮಾತ್ರ ಎಂದೊ ಕಾಣೆ||೫||

✍️... ಅನಿತಾ ಜಿ.ಕೆ.ಭಟ್.
29-01-2022.

ಮಾಮ್ಸ್‌ಪ್ರೆಸೊ ದಿನದ ಚಿತ್ರಕ್ಕೆ ಬರೆದ ಸಾಲುಗಳು..