ಜೋಜೋ ಗಣಪ ಜೋಜೋ ಬೆನಕ
ಜೋಜೋ ಗೌರೀಸುತ ಜೋಜೋ ಸುಮುಖ||ಪ||
ಚೌತಿಯು ಬಂದಿದೆ ಸಂಭ್ರಮ ತುಂಬಿದೆ
ನಾಳೆಯ ದಿನ ಭೂಲೋಕದಲಿ
ಹೊರಡುವ ಮೊದಲೇ ಕಣ್ಣತುಂಬಾ ನಿದ್ದೆಯ ಮಾಡು ಚಂದದಲಿ||೧||
ದೂರದ ದಾರಿ ಪುಟ್ಟದು ವಾಹನ
ಕಷ್ಟವು ಡೊಳ್ಹೊಟ್ಟೆ ಸವಾರಿ
ಭಕ್ತರನೆಲ್ಲ ಅನುಗ್ರಹಿಸುವ ನೆಪದಲಿ
ಬೇಗನೆ ಮಲಗು ಚಿನ್ನಾರಿ||೨||
ಬಾಲಗಣಪನ ಲೀಲೆಯ ಮೆಚ್ಚುತ
ಶಿವೆಯು ಲಾಲಿಯ ಹಾಡಿಹಳು
ತಪ್ಪಿಗೆ ಮರುಗಿದ ಹರನೂ ಕೂಡಾ
ಸುತನನು ಹರಸಿಹನು||೩||
ಉಮಾಶಿವರೀರ್ವರ ಕರಗಳೆ ತೊಟ್ಟಿಲು
ಪುಟ್ಟ ಗಜಾನನ ವಿನಾಯಕಗೆ
ಮೂಷಿಕವಾಹನ ಕಾಯುತಲಿಹನು
ಭೂಲೋಕದ ಸವಾರಿಗೆ||೪||
ಉಂಡೆಚಕ್ಕುಲಿ ಮೋದಕ ಕಡುಬು
ಪಂಚಕಜ್ಜಾಯ ಲಾಡು
ಮಾಡುತಲಿಹರು ಕಾಯುತ ನಿನ್ನ
ಸುಖನಿದ್ದೆಯನು ಮಾಡು||೫||
ನಾಳೆಯ ದಿನವು ಬೇಗನೇ ಎದ್ದು
ಭಕುತರ ಹರಸಪ್ಪಾ
ಇಳೆಯೊಳು ಸಕಲರು ಸೌಖ್ಯದಲಿರಲು
ವಿಘ್ನಗಳೆಲ್ಲವ ಕಳೆಯಪ್ಪಾ||೬||
ಜೋಜೋ ಗಣಪ ಜೋಜೋ ಬೆನಕ
ಜೋಜೋ ಗೌರೀಸುತ ಜೋಜೋ ಸುಮುಖ||
✍️... ಅನಿತಾ ಜಿ.ಕೆ.ಭಟ್
30-08-2022.
