ಪ್ರೇಮ ಸಿಂಚನ

 

ಪ್ರೇಮ ಸಿಂಚನ

ಮಂದ ಪವನ ಬೀಸಿಬಂದು
ನಾಲ್ಕು ಹನಿಯ ಉದುರಿಸಿ
ನೀ ಬರುವ ಹಾದಿಯಲ್ಲಿ
ನಗುವ ಹಸಿರು ಗರಿಕೆ ಚಿಗುರಿಸಿ||೧||

ಬಾನ ತುಂಬಾ ಸದ್ದು ಮಾಡಿ
ಮೋಡ ಓಡಿ ಹೋಗಿದೆ
ಹಿಡಿಯದಾದೆ ನಿನ್ನ ಕೂಡ
ಭುವಿಯಂತೆ ದುಗುಡ ನನಗಿದೆ||೨||

ಮಧುರ ಮಾತು ಒಲವ ಗೀತೆ
ಕರ್ಣದೊಳಗೆ ರಿಂಗಣ
ಅಧರಕಧರ ಬೆಸೆಯದಿರಲು
ಹುಸಿ ಮುನಿಸಿನ ಕಾರಣ||೩||

ಎಲ್ಲೆ ಮೀರಿ ನಡೆಯೆನೆಂದ
ನಲ್ಲ ನುಡಿಯ ಮರೆತೆಯಾ
ಕಲ್ಲು ಹೃದಯವ ಹೂವಾಗಿಸಿ
ಬಲ್ಲ ಸವಿಯ ಉಣಿಸೆಯಾ||೪||

ನಾನು ನೀನು ಬೆರೆಯಲಿಂದು
ಪರಿಶುದ್ಧ ಪ್ರೇಮ ಒರತೆಯು
ನೀನು ನನ್ನ ಮರೆತರಂತೂ
ನಯನ ದುಃಖ ಜಲಭರಿತವು||೫||

ಗರಿಕೆ ನಗುವ ಮರೆವ ಮುನ್ನ
ವಿರಹ ಅಳಿಸಿ ಬಂಧನ
ಅರಿಕೆ ನನ್ನದು, ಕೈ ಹಿಡಿದು ನನ್ನ
ಭರಿಸು ಪ್ರೇಮ ಸಿಂಚನ||೬||

✍️... ಅನಿತಾ ಜಿ.ಕೆ.ಭಟ್.
25-12-2020.

ಸಿಗ್ನೇಚರ್ ಲೈನ್- ಸೌಹಾರ್ದ ಬಳಗ- ನೀನು ಬರುವ ಹಾದಿಯಲ್ಲಿ ಗರಿಕೆ ಚಿಗುರಿ ನಗುತಿದೆ-

ಚಿತ್ರ ಕೃಪೆ:- ಅಂತರ್ಜಾಲ.