ನಮ್ಮ ಪುಟ್ಟ- ಕೀಟಲೆ ಕಿಟ್ಟ

 

ಕೀಟಲೆ ಕಿಟ್ಟ

ಕೆನೆಯಹಾಲ ಕೇಳಿ ಕುಡಿವ
ನಮ್ಮ ಪ್ರೀತಿಯ ಪುಟ್ಟ
ಮನೆಯ ಒಳ-ಹೊರ ಆಡಿ ನಲಿವ
ತುಂಟ ಕೀಟಲೆ ಕಿಟ್ಟ||೧||

ಮಳೆ ಬಂದರೆ ನೆನೆಯುತಿರುವ
ಯಾರ ಮಾತನು ಕೇಳನು
ದೋಣಿ ಮಾಡಿ ನೀರೊಳಾಡಿ
ತನ್ನ ತಾನೇ ಮರೆವನು||೨||

ದೀಪ ಬೆಳಗೆ ಸೆರಗ ಹಿಡಿವ
ಬಾಗಿ ಬಿಸಿಯ ಮುಟ್ಟುವ
ಕುಳಿತ ಅಮ್ಮನ  ಜಡೆಯನೆಳೆದು
ತುದಿಯ ನೇಯ್ದು ಕಟ್ಟುವ||೩||

ತೊದಲು ಮಾತಲಿ ಎಲ್ಲರೊಡನೆ
ಬೆರೆತು ಹೊಸತು ಕಲಿಯುವ
ಅಪ್ಪ ಬರಲು ಬೇಗನೋಡುತ
ತಿನಿಸ ಚೀಲದಿ ಹುಡುಕುವ||೪||

ಹಲವು ಮಾದರಿ ಕಾರು ಬೈಕು
ಬೇಕು ಅವನ ಆಟಕೆ
ಕೆಲವು ದಿನದಿ ಗಾಲಿ ಕಳಚೆ
ಸಿದ್ಧ ನವೀನ ಪ್ರಯೋಗಕೆ||೫||

ದಿನವು ಬೇಡುವ ಕನಸು ಕಾಣುತ
ಹೊಸತು ಫಳಫಳ ಫೋನನು
ಲಲ್ಲೆಗರೆದು ಮುದ್ದುಮಾಡಲು
ಹುಸಿಯ ಕೋಪವ ಮರೆವನು||೬||

ಲಾಲಿ ಹಾಡಿ ತೂಗಿ ಮಲಗಿಸಿ
ಅಮ್ಮ ದೃಷ್ಟಿ ತೆಗೆವಳು
ಪುಟ್ಟ ಚಂದಿರ ಎಷ್ಟು ಸುಂದರ
ದೇವನುಡುಗೊರೆ ಎನುವಳು||೭||

✍️... ಅನಿತಾ ಜಿ.ಕೆ.ಭಟ್.
26-06-2021.
ದತ್ತ ವಿಷಯ:ನಮ್ಮ ಪುಟ್ಟ

ಚಿತ್ರ ಕೃಪೆ: ಅಂತರ್ಜಾಲ