ಬಾಳ ದಿವ್ಯಮಂತ್ರ

 

#ಬಾಳ ದಿವ್ಯಮಂತ್ರ

ಎದೆಯೊಳಗಿನ ನೋವಪರದೆಯ
ಸರಿಸುವಂತಹ ಕೈಗಳು||ಪ||
ಎಲ್ಲಿಹುದು ಅರಸದೆಯೆ ಛಲದಿ
ನಿನ್ನನೇ ನಂಬಿ ಬಾಳು||ಅ.ಪ.||

ಕನಸುಗಳ ಹೊಸೆಹೊಸೆದು ಶ್ರಮಬೆವರಬೆಸೆದು
ತೂಗುವ ಫಲವದುವೆ ಸುಗ್ಗಿ
ಮನಸು ದೇವನಲಿರಿಸಿ ಅರ್ಪಣೆಯ ಸಲಿಸಿ
ಬದುಕುತಿರು ದಿನವೂ ಹಿಗ್ಗಿ||೧||

ಖುಷಿಯಕಡಲೆಲ್ಲಿಹುದು? ಹೊಡೆತಸಹಿಸುವುದು ಭೋರ್ಗರೆವ ಶರಧಿಗೂ ತಪ್ಪ
ನಶಿಸುತಿಹ ಕ್ಷಣಕ್ಷಣಕೂ ಕರ್ಮಲೇಪನವಿರಲು
ಕಳೆಗಟ್ಟಿ ಬದುಕು ಒಪ್ಪ||೨||

ನಿಗಿನಿಗಿಸುಡುಕೆಂಡ ಜಲಸೋಕಿದಕೂಡೆ
ತಣಿದು ಮಸಿಯೆನಿಪಸೂತ್ರ
ನಸುನಗುವ ವದನದಲಿ ಸವಿಮಾತ ಒನಪಿನಲಿ
ಅಡಗಿಹುದು ಬಾಳದಿವ್ಯಮಂತ್ರ||೩||

✍️... ಅನಿತಾ ಜಿ.ಕೆ.ಭಟ್.
04-05-2021.