ನಮ್ಮ ಸುತ್ತ

 

#ನಮ್ಮ ಸುತ್ತ

ಕಾ ಕಾ ಕೂಗುವ ಕಾಗೆ
ಕರ್ಕಶ ಧ್ವನಿಯದು ಕಿವಿಗೆ
ಊರೆಲ್ಲ ಹುಡುಕಿ ಕೊಳಕನು ಹೆಕ್ಕಿ
ಸ್ವಚ್ಛವ ಮಾಡುವುದು ಕುಕ್ಕಿ||೧||

ಕೆಂಪು ಕೊಕ್ಕು ಹಸಿರುಮೈಯ
ಗಿಣಿಯು ಹಾರುವ ಪಕ್ಷಿ
ಮಾತನು ಕಲಿತು ನಮ್ಮೊಳು ಬೆರೆತು
ಬಾಳುವ ಪಂಜರ ಪಕ್ಷಿ||೨||

ಚಿಂವ್ ಚಿಂವ್ ಎನುತಿದೆ ಗುಬ್ಬಚ್ಚಿ
ಕುಳಿತಿದೆ ಬೆಚ್ಚನೆ ಗೂಡನು ಕಟ್ಟಿ
ಹಾರಿಹೋಗಿ ಕಾಳನು ಅರಸಿ
ಸಾಕಿದೆ ಮರಿಗಳಿಗುಣಿಸಿ||೩||

ಗದ್ದೆಯ ತುಂಬಾ ಬೆಳ್ಳಕ್ಕಿಹಿಂಡು
ಬೆರಗಾದೆ ಬಿಳುಪನು ಕಂಡು
ಧ್ಯಾನದಿ ನಿಂತು ಕ್ರಿಮಿಗಳ ಹಿಡಿದು
ಹಾರಿದೆ ಬಾನಲಿ ಚಿತ್ರವ ಬರೆದು||೪||

ಬಣ್ಣದ ಚಿಟ್ಟೆ ಊರಲಿ ಸುತ್ತಿ
ಕುಳಿತಿದೆ ಹೂವಿನ ಮೇಲೆ
ತರತರ ರಂಗಿನ ಚಿತ್ರವ
ಬರೆದವರಾರು ಮೈಮೇಲೆ||೫||

✍️... ಅನಿತಾ ಜಿ.ಕೆ.ಭಟ್.
15-07-2021.