ಋತು

**ನಾನೊಂದು ಹೆಣ್ಣು**

ಹುಟ್ಟಿದಾಗಲೇ ಜಗಕೆಲ್ಲ ತಿರಸ್ಕಾರ
ನಾನಾದೆನೆಂದು ಹೆಣ್ಣು
ಹೆತ್ತವಳಿಗೆ ಆರದ ವಾತ್ಸಲ್ಯ ಮಮತೆ
ಕಾಲ್ಗೆಜ್ಜೆ ಸಪ್ಪಳ ಮನೆತುಂಬಿತು
ಮನೆಯಂಗಳವು ನನ್ನ ಸಂತಸಕೆ ಸಾಕ್ಷಿಯಾಯಿತು
ಬೀದಿ ತುಂಬ ನಕ್ಕುನಲಿದೆ
ಸ್ವಚ್ಛಂದದಿ ಹಾರಾಡುವ ಹಕ್ಕಿಯಾದೆ
ಗರಿಬಿಚ್ಚಿ ಕುಣಿವ ನವಿಲಾದೆ....


ಅದೊಂದು ದಿನ ಜಗಕೆ ಕಾಲಿಟ್ಟ ವಸಂತ ಋತು
ನನ್ನೊಳಗೆ ಅದೇ...ಅದೇ..ಹೆಣ್ತನದ ಋತು
ಸುತ್ತೆಲ್ಲರ ದೃಷ್ಟಿಯಲಿ ನಾನೀಗ ಪ್ರೌಢ ಹೆಣ್ಣು
ಕಾಮುಕರಿಗೋ ನನ್ನ ಮೇಲೆ ವಕ್ರಕಣ್ಣು....

ಬೀದಿಯಾಟಕೆ ಬಿತ್ತು ಬೇಲಿ
ಇಣುಕಿದೆ ಕಿಟಿಕಿ ಸಂದಿಯಲಿ
ಹಾಡುತಿದೆ ಕೋಗಿಲೆ ಇಂಪಾಗಿ;ನಾನೋ ಮೂಲೆಗುಂಪಾಗಿ
ಯಾಕೀ ಬಂಧನವೊ ತಿಳಿಯದು ಮನಕೊಂದೂ
ಋತು ವ ನಿಂದಿಸಿದೆ ಯಾಕೆ ಬಂದೆಯೆಂದು.....



ಕರೆಯುತಿರುವೆ ಓ.. ನನ್ನ ಪ್ರೇಮಿಯೇ
ವಸಂತ ಶರತ ಶಿಶಿರ ಯಾರಾದರೂ ಸರಿಯೇ
ಜಗದ ಷರತ್ತುಗಳ ಮುರಿಯಲು ಬನ್ನಿ
ನನ್ನ ಕನಸುಗಳಿಗೆ ನೀರೆರೆಯ ಬನ್ನಿ
ಕತ್ತಲಗೋಡೆಯೊಳಗೆ ಕರಗಿರುವ ಹೆಣ್ಣ ಬಾಳಿಗೆ
ಸಂತಸದ ಸೆಲೆಯಾಗಬನ್ನಿ..

                                  ಇಂತಿ...
                                  ನಾನೊಂದು ಹೆಣ್ಣು.


✍️... ಅನಿತಾ ಜಿ.ಕೆ.ಭಟ್.
14-12-2019.