ಏಡ್ಸ್

ಬಂಧನವಿಲ್ಲದ ಸುಖಮೋಹದಲಿ
ಅಂಟಲು ದೇಹಕೆ ಪಿಡುಗು
ಬಾಂಧವ್ಯವದು ಮಿಲನದಲಿ
ಆರಿತು ಬಾಳಿನ ಬೆಡಗು||

ಮನಸಿನ ದಾಳಕೆ ಒಳಗಾಗಿ
ಬುದ್ಧಿಯು ದಾಸ್ಯಕೆ ಬಲಿಯು
ಕನಸಿನ ನಾಳೆಯ ತಿರುವಾಗಿ
ವ್ಯಾಧಿಯ ಕರಾಳ ನಗೆಯು||

ಉದರವ ತಣಿಸುವ ಕಾಯಕದಿ
ಬದುಕದು ಮೂರಾಬಟ್ಟೆ
ಆದಳು ಹೆಣ್ಣು ಕಾಮುಕನಿಗೆ
ಸುಖವುಣಿಸುವ ಬಣ್ಣದ ಚಿಟ್ಟೆ||

ಪತಿಯನೆ ನಂಬಿದ ಸತಿಗಿಂದು
ಮಹಾಮಾರಿಯ ಬಹುಮಾನ
ಕಣ್ಣೀರೊರೆಸಲು ಪತಿಯೆಲ್ಲಿಹನು
ಯಮರಾಜನು ಒಯ್ದಿಹ ಅವನ||

ರಕುತವ ಪಡೆಯುವ ಮುನ್ನ
ಪರೀಕ್ಷೆಯ ಮಾಡುವುದು ಚೆನ್ನ
ಚುಚ್ಚವ ಸಿರಿಂಜ್  ಕಡೆಗೊಮ್ಮೆ
ಎಚ್ಚರನೋಟವ  ಹರಿಸೊಮ್ಮೆ||

ರೋಗಪೀಡಿತೆ ಅಮ್ಮನ ಗರ್ಭದಲಿ
ಬೆಚ್ಚನೆ ಮಗುವಿದೆ ಮಡಿಲಿನಲಿ
ಅಮೃತಪಾನವ ಮಾಡಿಸದೆ
ಕೆಚ್ಚಲಿನ ಗೋಕ್ಷೀರವ ಕುಡಿಸುತಲಿ||

ಅಂಟಿದ ಜಾಡ್ಯವು ಎಂದಿಗೂ ಬಿಡದು
ಸುಮ್ಮನೆ ಎಂದೂ ಪಸರಿಸದು
ಹಿಡಿತವಿರಲಿ ಕಾಮಸೂತ್ರದಲಿ
ಏಕಸಂಗಾತಿಯಿರಲಿ ಬದುಕಿನಲಿ||

ರೋಗಿಗೆ ಪ್ರೀತಿ ಕಾಳಜಿಯೆ
ತುಂಬುವುದು ನಿರೋಧಕ ಶಕ್ತಿ
ನೋವನು ಮರೆತು ನಗುನಗುತ
ಬಾಳುವುದೇ ರೋಗವ ಗೆಲ್ಲುವ ಯುಕ್ತಿ||

✍️... ಅನಿತಾ ಜಿ.ಕೆ.ಭಟ್.
14-12-2019.