ಗಣಪ ಬರುವ ಮನೆಗೆ

#ಗಣಪ ಬರುವ ಧರೆಗೆ

ಗಣಪ ಬರುವ ಧರೆಗೆ
ಚೌತಿಯ ಸುದಿನ| ಗಣಪ ಬರುವ ಧರೆಗೆ||ಪ||
ಬೆನಕ ಬರುವ ಮನೆಗೆ
ಗೌರಿಯ ಕಂದ| ಶುಭವ ತರುವ ನಮಗೆ||ಅ.ಪ.||

ಬೊಮ್ಮನ ಬರುವಿಗೆ ಸುಮ್ಮನೆ ಕಾಯದೆ
ಘಮ್ಮನೆ ಕಜ್ಜಾಯ ಅಣಿಗೊಳಿಸಿ
ಮೂಷಿಕವಾಹನ ತೋಷದಿ ನಲಿಯಲು
ಘೋಷವ ಗೈಯುವ ನಾಮಗಳ||೧||

ಸಿದ್ಧಿಬುದ್ಧಿಯ ನೀಡಿ ಬಾಧಕ ಕಳೆವಾತ
ಆದರದಿ ಮೊದಲು ಪೂಜೆಗೊಂಬಾತ
ಓಂಕಾರನಾದಪ್ರಿಯ ಶಂಕರತನಯ
ಸಂಕಷ್ಟ ನೀಗುವ ಗಿರಿಜೆಯ ಕುವರ||೨||

ಸೊಕ್ಕನು ಇಳಿಸಲು ಪಕ್ಕನೆ ವಧಿಸಿ
ಉತ್ತರ ಗಜಶಿರ ಜೋಡಿಸಿದಶಿವ
ನಕ್ಕ ಚಂದಿರಗೆ ತಕ್ಕ ಶಾಪವನು
ಇತ್ತಿಹ ಮೋದಕಪ್ರಿಯ ಪ್ರಣವ||೩||

ಶನಿಯನುಕಂಡು ಗರಿಕೆಯ ರೂಪದಿ
ಅಡಗಿದ ಗೋವಿನ ಉದರದಲಿ
ಗೋಮಯದಲ್ಲಿ ಹೊರಗಡೆ ಬಂದು
ಮಣಿಸಿದ ಶನಿಯನು ಜಾಣ್ಮೆಯಲಿ||೪||

ವೇದವ್ಯಾಸರು ಹೇಳಿದ ಕಥೆಯನು
ಬರೆದಿಹ  ಗಣಪತಿ ಲಿಪಿಕಾರ
ಲೇಖನಿ ಮುನಿಸೆ ದಂತವ ಮುರಿದು
ಮುಂದುವರಿಸಿದ ಛಲಗಾರ||೫||

ಪರಮಪಾವನ ಬಂಧವಿಮೋಚನ
ಅಭಯವನೀವ ಭಕುತರಿಗೆ
ಮುನಿಜನ ನಮಿಸುವ ವೇದಜ್ಞಾನಿ
ಶುಭಮತಿಯ ನೀಡು ನಮಗೆ||೬||

✍️.. ಅನಿತಾ ಜಿ.ಕೆ.ಭಟ್.
09-09-2021.
ಸರ್ವರಿಗೂ ಗಣೇಶ ಚತುರ್ಥಿಯ ಹಾರ್ದಿಕ ಶುಭಾಶಯಗಳು.. 💐