ಪ್ರಕೃತಿಯೊಂದಿಗೆ ಋತುಗಳ ಲಾಸ್ಯ

*** ಪ್ರಕೃತಿಯೊಂದಿಗೆ ಋತುಗಳ ಲಾಸ್ಯ ***
""""""""""""""""""""""""""""""""""""""""""""""""""""


ವೈಭವದಿ ಕುಣಿಯಿತು ವಸಂತ ಋತು
ಮಾಮರವು ತುಂಬಿತ್ತು ಚಿಗುರ ಹೊತ್ತು
ಕೋಗಿಲೆಯು ಇಂಪಾಗಿ ತರುಲತೆಸೊಂಪಾಗಿ
ಮೈದುಂಬಿ ನಿಂತಿಹುದು ಇಳೆಯು ಕಳೆಯಾಗಿ||

ಕಳ್ಳ ಹೆಜ್ಜೆಯಿಡುತಿತ್ತು ಉಗ್ರತಾಪ
ಗ್ರೀಷ್ಮಕೆ ತಾಳದ ವರುಣನ ಕೋಪ
ಧಗೆಯೂ ಕಾರ್ಮುಗಿಲೂ ಗೆಳೆತನವ ಮಾಡಿ
ಜಗದೆಲ್ಲ ಸಂಕುಲದ ಆಕ್ರಂದನ ನೋಡಿ||

ಹರ್ಷದ ಹೊಂಗಿರಣ ವರ್ಷ ಋತು
ಆಕರ್ಷಣೆಯ ಸಾಂಗತ್ಯದ ಹನಿಮುತ್ತು
ಆಟಿಯ ಕೂಟದ ಬಯಕೆಯೊಳು
ಮೈದುಂಬಿ ಹರಿಯಿತು ಹಳ್ಳಕೊಳ್ಳ||


ಸರಸರನೆ ಎಲೆಯುದುರಿಸಿದ ಶರತ
ಭೂರಮೆಯ ಬೋಳಿಸುವುದವನ ಶಪಥ
ಸುಯ್ಯೆಂದು ತಂಗಾಳಿ ಜೊತೆಗೆ ಹೇಮಂತ
ಗಿಡಮರಗಳೆಲ್ಲ ಲಾಸ್ಯದಲಿ ನರ್ತಿಸುತ||

ಮಂಜು ಮುಸುಕಿನಲಿ ಶಿಶಿರ ಋತು
ಮೈದಡವಿ ಹಸಿರ ಚಾದರ ಹೊದೆಸಿತು
ಪ್ರೇಮದಲಿ ಒಲಿದಿಹಳು ವಸುಂಧರೆ
ಕೊರಳೊಡ್ಡಿ ನಿಂತಿಹಳು ಇಬ್ಬನಿಗೆ ಧರೆ||

ಮತ್ತದೇ ಚಕ್ರದಲಿ ಬರುವನು ವಸಂತ
ಭುವಿಗೆ ಕನಸು ನನಸಾಗುವುದೋ ಧಾವಂತ
ಕಾತರದಿ ಭೂದೇವಿ ನಿಂದಿಹಳು ಕಾದು
ಸಂಕುಲವನೆಲ್ಲ ಒಡಲೊಳಗೆ ಪೊರೆದು||

          .                🌳
✍️...ಅನಿ ಅಜಿ.ಕೆ.ಭಟ್.
14-12-2019.