ಗಾಂಧಾರಿ ಮೆಣಸು

 

#ಗಾಂಧಾರಿ ಮೆಣಸು

ತರತರದ ಮೆಣಸುಗಳ ಮೆಚ್ಚುತಲಿ
ಸವಿಯುತಲಿ ನನ್ನನೆಂದೂ ಮರೆಯದಿರಿ
ಖಾರದಿ ಸುಂಯ್ಯೆನುತ ಪರಿಮಳದಿ ಘಮ್ಮೆನಲು
ಯಾವಡುಗೆಗೂ ಸೈ ನಾನೇ ಗಾಂಧಾರಿ||೧||

ಕರಾವಳಿಯ ತೀರ ಮಲೆನಾಡ ಮಣ್ಣಿನಲಿ
ನಾನಿದ್ದರೇ ರುಚಿಯು ಗೊಜ್ಜುಸಾರು
ಜೀರಿಗೆ ಮೆಣಸು ಸೂಜಿ ಮೆಣಸು ಕಕ್ಕೆ
ಮುನ್ಚಿ ಹೀಗೆನಗಿಹುದು ಹಲವು ಹೆಸರು||೨||

ವಿಷವನುಣ್ಣುತ ಬೆಳೆದ ಹಲವು ತಳಿಗಳ
ಮೆಣಸು ಕಣ್ಣಿಗಷ್ಟೇ ಬರಿ ಅಂದ ಚಂದ
ಔಷಧಿಯೆ ಆಗುವೆನು ಎಲ್ಲೆಲ್ಲೂ ಬೆಳೆಯುವೆನು
ಸಣ್ಣಗಾತ್ರದಿ ಹೊಳೆವೆ ಪಚ್ಚೆಕೆಂಪಿನಿಂದ||೩||

ನಾಲಿಗೆಗೆ ಕಟುವಾದ ರುಚಿಯನ್ನು ತೋರುವೆ
ಉದರದೊಳಗಿಳಿಯುತಲಿ ಗುಣವು ತಂಪು
ಚಿಲಿಪಿಲಿ ಗುಬ್ಬಕ್ಕ ಕಾಗಕ್ಕನಿಗೆ ಪ್ರಿಯವು
ಗಿಳಿಗಳಿಗೆ ಆಗಾಗ ನನ್ನದೇ ನೆಂಪು||೪||

ಬೇಡದೆಯೆ ಏನನೂ ಹಿತ್ತಲಲಿ ಬೆಳೆಯುವೆ
ಮಾರುಕಟ್ಟೆಯಲೀಗ ಬೆಲೆಯುಳ್ಳ ಮೆಣಸು
ನೋಡದೆಯೆ ಕಣ್ಣೆತ್ತಿ ಕಿತ್ತೆಸೆಯದಿರಿ, ಗುಣವ
ಅರಿಯುತ ಬರಲಿ ಬಳಸುವ ಮನಸು||೫||

✍️... ಅನಿತಾ ಜಿ.ಕೆ.ಭಟ್.
28-03-2022.