ಅಂದು- ಇಂದು

#ಅಂದು- ಇಂದು

------------------

ಅಂದು ನಾನಾಗಿದ್ದೆ

ಬಲು  ಚೂಟಿ ತುಂಟಿ

ಇಂದು ಕಂಡೊಡನೆಯೇ

ಕರೆಯುವರೆನ್ನ ಆಂಟಿ!!೧||

ಅಂದು ಬಲು ಪ್ರಿಯವಾಗುತಿತ್ತು

ಎಥ್ನಿಕ್ ಡೇ, ಸಾರಿ ಡೇ

ಇಂದು ನಾ ಹಠಹಿಡಿಯಬೇಕಾಗಿದೆ

ಚೂಡಿ, ಕುರ್ತಾ ತೊಡುವುದ ಬಿಡೆ!!೨||

ಅಂದು ಶಾಲಾಕಾಲೇಜಿಗೆ ಪಯಣ

ನಡೆಯುತಲಿ ದಿನಕೊಂದು ಮೈಲಿ

ಇಂದು ರೋಗ ರುಜಿನ ಬರದಂತೆ

ನಡೆಯುವುದು ಜೀವನಶೈಲಿ!!೩||

ಅಂದು ಖರೀದಿ ಸಮಯದಿ

ಹಾಕುತಿದ್ದೆ ಪೈಸೆಗೆ ಪೈಸೆ ಲೆಕ್ಕ

ಇಂದು ರಶೀದಿ ಕಂಡರೆ ಬರುವರು

ಎಟಿಎಂ ಕಾರ್ಡ್ ಹಿಡಿದು ಪಕ್ಕ!!೪||

ಅಂದು ಅಳೆಯುತಿದ್ದರು ನೋಡಿ

ಪರೀಕ್ಷಾ ಗ್ರೇಡ್ ಮಾರ್ಕ್

ಇಂದು ದಿಟ್ಟಿಸುತ ಬೆಳ್ಳಿಕೇಶ 

ಮುಖದ ಮೇಲಿನ ಸುಕ್ಕು!!೫||

ಅಂದು ಅರ್ಧ ಗಂಟೆಯಲಿ ಅಡುಗೆಯ

ಕೆಲಸ ಹಿಡಿಯುತಿತ್ತು ಬೋರು

ಇಂದು ನಾವೇ ಇರಲಿ, ನೆಂಟರೆ ಬರಲಿ

ಅಡುಗೆಮನೆಯಲೇ ಕಾರುಬಾರು!!೬||

ಅಂದು ಹಳ್ಳಿಯ ಹಸಿರ ಪರಿಸರದಿ

ಸ್ವಚ್ಛ ಶುದ್ಧ ಉಸಿರು

ಇಂದು ನಗರದ ಕಾಂಕ್ರೀಟು ಕಾಡೊಳಗೆ

ಗೃಹಿಣಿಯೆಂಬ ಹೆಸರು!!೭||

ಅಂದು ಗುನುಗುತಲಿದ್ದೆ ಆಗಾಗ

ಪ್ರೇಮ ಚಿತ್ರದ ಗೀತೆಯನು

ಇಂದು ಕಲಿತಿಹೆ ಲಾಲಿ, ಜೋಗುಳವ

ಮಲಗಿಸಲೆಂದು ಮಕ್ಕಳನು!!೮||

ಅಂದು ಆಗಾಗ ಒರೆಸಲು

ತಪ್ಪದು ಕೈಲೊಂದು ಟವೆಲು

ಈಗಲೂ ಕ್ಷಣಕೊಮ್ಮೆ ನೇವರಿಸಲು

ಬೇಕೇಬೇಕು ಕೈಲಿ ಮೊಬೈಲು!!೯||

ಅಂದು ಓದಿ ಬರೆಯಲು

ಆಗ್ರಹಿಸುತಿದ್ದರು ಅಮ್ಮ

ಇಂದು ಅದೇ ಆದೇಶ ಮಕ್ಕಳಿಗೆ

ನಾನಾಗಿ ಶಿಸ್ತಿನ ಅಮ್ಮ!!೧೦||

ಅಂದು ಹೊಟ್ಟೆ ತುಂಬಲು

ಸೇವಿಸುತಿದ್ದೆ ಆಹಾರ

ಇಂದು ಹೊಟ್ಟೆ ಬೆಳೆಯದಂತೆ

ಶರೀರವಾಗದಂತೆ ವಿಕಾರ!!೧೧||

ಅಂದು ಎಲ್ಲರ ನಗುಮುಖವೂ

ಕೊಡುತಿತ್ತು ಮುಗ್ಧ ಖುಷಿ

ಇಂದು ತಿಳಿಯುತಿದೆ ಮತಿಗೆ

ನಗುವಿನ ಮುಖವಾಡ ಹುಸಿ!!೧೨||

ಅಂದು ಕನ್ನಡಿ, ಪೌಡರ್, ಬಿಂದಿ, ಬಟ್ಟೆಗೆ

ಸೆಳೆಯುವ ಮೋಹದ ಚಿಟ್ಟೆ

ಇಂದು ಬೆಣ್ಣೆಯ ಮಾತು, ಬಣ್ಣದ ಥಳಕಿಗೂ

ಬಗ್ಗದೆ ಮಾನಿನಿ ದಿಟ್ಟೆ!!೧೩||

✍️... ಅನಿತಾ ಜಿ.ಕೆ.ಭಟ್.

23-03-2022.

#ಫೇಸ್ಬುಕ್ ಬರಹ ವೇದಿಕೆಯೊಂದರಲ್ಲಿ "ಮದುವೆಯ ಮೊದಲು ಮತ್ತು ಮದುವೆಯ ನಂತರ ನಿಮ್ಮಲ್ಲಾದ ಬದಲಾವಣೆ" ಎಂಬ ಥೀಂ ಕಂಡಾಗ ಬರೆಯಬೇಕೆನಿಸಿದ ಸಾಲುಗಳು..