ಬಾಗುತಿರು ಹಿರಿಯರಿಗೆ

 

#ಬಾಗುತಿರು ಹಿರಿಯರಿಗೆ

ಹಿತವ ಬಯಸುವರಾರು ಹೊಸಕಿಹಾಕುವರಾರು
ಅರಿಯದೆ ಹೋದೆಯಾ ಮೂಢನಾಗಿ
ಒಳಿತು ಬಯಸುವ ಹೃದಯ ಸನಿಹವಿರುತಿರಲು
ಬಾಗುತಿರು ಹಿರಿಯರಿಗೆ ವಿಧೇಯನಾಗಿ||೧||

ಅಹಮಿಕೆಯ ಕೋಟೆಯೊಳು ತಾನೆಂದು
ಬೀಗದಿರು ಹಸನಾಗೆ ಬೆವರಿಳಿಸಿದವರ ಮರೆತು
ನಿನ್ನ ಪದವಿಯಲವರ ವರುಷಗಳ ಕನಸಿಹುದು
ತ್ಯಾಗವದು ಎಳೆಯರಿಗೆ ಬಾಳಿದರ ಅರಿತು||೨||

ಮುಂದಿರುವ ಗುರಿಗಿಂದು ಗುರುವಾಗಿ ನಿಂದಿಹರು
ಬಾರದೆಲೆ ಕಷ್ಟಗಳು ಸರಮಾಲೆಯಂತೆ
ಬಾಳಮುಸ್ಸಂಜೆಯಲಿ ತುಸುಪ್ರೀತಿಯನು ತೋರು
ಹರಸುವರು ಮನದುಂಬಿ ಮಗುವಿನಂತೆ||೩||

ಬಿಂಕಬಿಗುಮಾನಬಿಡು ಬಿಗಿಗೊಳಿಸು ಬಂಧವನು
ಜನನಿಜನಕರ ಸೇವೆ ಪುಣ್ಯತಮವು
ಶಂಕರನು ಮೆಚ್ಚುವನು ಶರಣೆಂಬ ಚರಣವನು
ಮನೆಯೆ ಮಂದಿರವಾಗಿ ಸಕಲಗೆಲುವು||೪||

✍️... ಅನಿತಾ ಜಿ.ಕೆ.ಭಟ್.
19-07-2021.