ಗುಲಾಬಿ

 

#ಚೆಂಗುಲಾಬಿ

ಬಣ್ಣಗಳು ಹಲವಾರು ಪರಿಮಳ ಬಗೆಬಗೆ
ಹೆಸರೊಂದೇ ಚೆಂಗುಲಾಬಿ
ಹಸಿರನಡುವಲಿ ಅರಳಿ ನಸುನಗೆಯ ಬೀರಿ
ಕಳೆಯುವೆ ಮನದ ಬೇಗುದಿ||೧||

ನೇಸರನ ಎದುರುಗೊಂಬುವೆ ಮುಗುಳಾಗಿ
ಮುತ್ತಿನ ಮಣಿಮಾಲೆ ತೊಟ್ಟು
ಸುಪ್ರಭಾತವ ಕೋರುವ ದುಂಬಿಯನೂಡುವೆ
ಸವಿಯಾದ ಮಕರಂದವನಿಟ್ಟು||೨||

ಮೃದುವಾದ ಪಕಳೆಯ ಕೋಮಲೆ ನಿಂದಿಹೆ
ಮೈತುಂಬಾ ಮುಳ್ಳನು ಸಹಿಸಿ
ಬದುಕಿನ ಕಠಿಣತೆ ಒಡಲೊಳಗೆ ಅಡಗಿಸುತ
ಚಿಗುರಿರಿ ಏಳಿಗೆಯ ಬಯಸಿ||೩||

ಸೌಗಂಧಸೂಸಿ ಕಣ್ಮನಸೆಳೆವ ಕ್ಷಣವದು ಕ್ಷಣಿಕ
ಬಲುದಿನದ ಶ್ರಮವಿರಲಿ ಹಿಂದೆ
ಮೊಗ್ಗನು ಕೊರೆವ ಹೂವನು ತಿನುವ ಕಟುಕ
ಕೀಟಗಳನೆದುರಿಸಿ ಸಾಗುತಿರಿ ಮುಂದೆ||೪||

✍️... ಅನಿತಾ ಜಿ.ಕೆ.ಭಟ್.
21-03-2022.
#ವಿಶ್ವ ಕಾವ್ಯದಿನದ ಶುಭಾಶಯಗಳು. 💐