ಒಗ್ಗಟ್ಟಿನಲಿ ಬಲವು
ದುಡಿದು ದಣಿದಿದೆ ದೇಹ
ಸುಕ್ಕುಗಟ್ಟಿದ ಚರ್ಮ
ಸಾರುತಿಹುದಿಲ್ಲಿ ಬಾಳ ಮರ್ಮ||
ಒಂದೊಂದು ಗೆರೆಯಲಿ
ನೂರಾರು ಬವಣೆ
ಹೊತ್ತು ಸಾಗಿದ ಬಾಳ ಹೊಣೆ||
ಹಿರಿಯರನು ಅನುಸರಿಸಿ ಕಿರಿಜೀವ
ನಡೆಸುತಿದೆ ದರಬಾರು
ಆಗೊಮ್ಮೆ ಈಗೊಮ್ಮೆ ಮಿತಿಯಿರದ ಕಾರುಬಾರು||
ಎಳೆಯ ಚಿಗುರದು
ಇನ್ನೂ ಮಾಗಿಲ್ಲ ಜಗದಲಿ
ಮುಗ್ಧತೆಯ ಎಳಸು ಕೈಗಳಲಿ||
ಹಿರಿಕಿರಿಯರ ಬೆವರು
ಅರಿವಿರದ ಹೊಸ ತಲೆಮಾರು
ಜೊತೆ ಸೇರಿ ಎಳೆವ ಬಾಳ ತೇರು||
ಹಸನಾದ ಜೀವನವು
ಹಸಿರಾದ ಹೊಲವು
ಬಸಿರಾದ ಒಲವು
ಒಗ್ಗಟ್ಟಿನಲಿ ಬಲವು
ಸಾರುತಿದೆ ಪಟವು||
✍️... ಅನಿತಾ ಜಿ.ಕೆ.ಭಟ್.
22-09-2020.
ಚಿತ್ರ :ಹವಿಸವಿ ಕೃಪೆ
No comments:
Post a Comment