ವಿದಾಯ..ಕಿರುಗತೆ #ಹವ್ಯಕ ಭಾಷಾ ಬರಹ

 

      "ಮೈಯೆಲ್ಲಾ ಸುಡ್ತು, ಕೈಕಾಲು ಬೇನೆ,ತಲೆಯಂತೂ ಭಾರ...ಯಪ್ಪಾ!!..ತಡಕ್ಕೊಂಬಲೇ ಎಡ್ತಿಲ್ಲೆ.."ಹೇಳಿಗೊಂಡು ಚಿಕಿತ್ಸಾಲಯದೊಳ ಬಂದ ಗಂಗೆಜ್ಜಿಯ ವೈದ್ಯ ಶ್ಯಾಮರಾಯರು ಕೂಲಂಕಷವಾಗಿ ಪರೀಕ್ಷೆ ಮಾಡಿದವು.ಪಥ್ಯಾಹಾರ,ಅನುಪಾನ,ಮದ್ದು ಹೇಂಗೆ ತೆಕ್ಕೊಂಬದು ಹೇಳಿ ಲಾಯಿಕಿಲಿ ವಿವರವಾಗಿ ತಿಳಿಸಿಕೊಟ್ಟು ಶುಲ್ಕ ತೆಕ್ಕೊಳದ್ದೆ ಕಳ್ಸಿಕೊಟ್ಟವು.ಬಾಯಿಮಾತಿಲ್ಲೇ ರೋಗಿಯ ಅರ್ಧಾಂಶ ಖಾಯಿಲೆ ಗುಣಮಾಡುವ, ಮಾನವೀಯ ಗುಣಂಗೊಕ್ಕೆ ಜನಾನುರಾಗಿ ಆಯಿದವು ವೈದ್ಯ ಶ್ಯಾಮರಾಯರು.

      ಹಣೆಯ ತುಂಬಾ ನೆರಿಗೆ,ರಕ್ತ ಮಾಂಸ ಎಲ್ಲ ಆರಿ ಕೃಶವಾದ ಶರೀರ,ಕಿವಿಹರ್ದು ಇನ್ನೇನು ಬೀಳ್ತು ಹೇಳ್ವಾಂಗಾದ ಅಮೆರಿಕನ್ ಡೈಮಂಡ್ ಬೆಂಡೋಲೆಗ,ಬಣ್ಣ ಮಾಸಿದ ಹಳೆಯ ಸೀರೆ_ಇಂಥ ದಯನೀಯ ಸ್ಥಿತಿಲ್ಲಿಪ್ಪ ಗಂಗೆಜ್ಜಿಯ ನೋಡಿ ಮನಸ್ಸಿಲ್ಲೇ ಮರುಗಿದವು ವೈದ್ಯ ಶ್ಯಾಮರಾಯರು.ಗಂಗೆಜ್ಜಿಯೋ ಸಣ್ಣ ಪ್ರಾಯಲ್ಲೇ ಗಂಡನ ಕಳಕ್ಕೊಂಡು ಊರೋರನ್ನೇ ತನ್ನ ಕುಟುಂಬ ಹೇಳ್ಯೊಂಡು ಪ್ರೀತಿಲ್ಲಿ ಬದ್ಕಿದ ಜೀವ.ಈಗ ಪ್ರಾಯ ಎಂಭತ್ತು ಅಪ್ಪಗ ವಯೋಸಹಜ ದೌರ್ಬಲ್ಯಂಗ.

      ಮದ್ದು ತೆಕ್ಕೊಂಡು ,ಕೈಲಿ ಕೋಲು ಊರಿಗೊಂಡು ಮೆಲ್ಲಂಗೆ ತನ್ನ ಮನೆಕಡೆ ಹೋವ್ತಾ ಇತ್ತು ಗಂಗೆಜ್ಜಿ.ಮನೆ ತಲ್ಪುಲೆ ಚೂರು ದಾರಿ ಇಪ್ಪಗ ನಡವಲೆಡಿಯದ್ದೆ ಸ್ಮೃತಿ ತಪ್ಪಿ ಬಿದ್ದತ್ತು ಗಂಗೆಜ್ಜಿ.ಎರಡ್ಮೂರು ಮನೆಯವು ಆ ದಾರಿಲಿ ಹೋಪದು ಬಿಟ್ರೆ ಬೇರೆ ಜನಸಂಚಾರ ಇಲ್ಲೆ; ಹಾಂಗಾಗಿ ಆರಿಂಗೂ ಗೊಂತಾಯಿದಿಲ್ಲೆ.ಪಾಪ....ಗಂಗೆಜ್ಜಿ ...ಕಸ್ತಲಪ್ಪಗ ಕೇಶವ ಜೋಯಿಸರು ಆ ದಾರಿಲ್ಲಿ ಲೈಟ್ ಹಾಕ್ಕೊಂಡು ನಡಕ್ಕೊಂಡು ಬಪ್ಪಗ ಏನೋ ಎರಡು ಮಿನುಗುವ ಬೆಣ್ಚು ಕಾಣ್ತು, ಮುಂದೆ ನಡೆತ್ತಾ ಎಂತ ಹೇಳಿ ನೋಡ್ತಾ...ಬಿದ್ದಿದು ಗಂಗೆಜ್ಜಿ... ಗಂಗೆಜ್ಜಿಗೆ ಪ್ರಜ್ಞೆ ಇಲ್ಲೆ ,ಆದರೂ ಬೆಂಡೋಲೆ ಹೊಳವದು ನಿಲ್ಸಿದ್ದಿಲ್ಲೆ.

      ಬಿದ್ದ ಗಂಗೆಜ್ಜಿಯ ಎತ್ತಿ,ಪ್ರಥಮ ಚಿಕಿತ್ಸೆ ಕೊಟ್ಟು,ನೆರೆಕರೆಯವಕ್ಕೆಲ್ಲ ತಿಳಿಸಿ, ಮುಂದಿನ ಚಿಕಿತ್ಸೆಗೆ ವೈದ್ಯ ಶ್ಯಾಮರಾಯರಿಂಗೆ ಕರೆ ಮಾಡಿದವು ಕೇಶವ ಜೋಯಿಸರು . ವೈದ್ಯ ಶ್ಯಾಮರಾಯರು ಚಿಕಿತ್ಸಾಲಯಂದ ಬಂದು ಸ್ನಾನಕ್ಕೆ ಬಚ್ಚಲು ಮನೆಗೆ ಹೋಯಿದವು.ಫೋನು ಕರೆ ಬಂದಪ್ಪಗ ವೈದ್ಯ ಪತ್ನಿ ಸುಮಕ್ಕ"ರೀ.. ಫೋನು"ಹೇಳಿ ಜೋರಾಗಿ ಗಂಡನ ಕೂಗಿತ್ತು."ಆತು ಬತ್ತೆ ಈಗ"ಹೇಳಿ ಮೆಲುದನಿಲ್ಲಿ ಹೇಳಿದ್ದು ಸುಮಕ್ಕಂಗೆ ಕೇಳಿದ್ದೋ? ಇಲ್ಲೆಯೋ ?ಗೊಂತಿಲ್ಲೆ.ಪುನಃ ಪದೇ ಪದೇ ಫೋನ್ ಕರೆ ಬಪ್ಪದು ಕೇಳಿ, ಏನೋ ತುರ್ತು ಕರೆ ಆದಿಕ್ಕು ಹೇಳಿ"ರೀ..ಬೇಗ ಮಿಂದಿಕ್ಕಿ ಬನ್ನಿ.ಫೋನ್ ಬಂತು ಹೇಳಿರೆ ಕೇಳ್ತಿಲ್ಯ? "ಹೇಳಿ ದನಿಯೇರಿಸಿತ್ತು.ಶ್ಯಾಮರಾಯರು "ಗಂಟ್ಲು ಹರ್ಕಳಡ್ದೇ...ಬತ್ತಿ"ಹೇಳಿ ತಾನೂ ದನಿಯೇರಿಸಿ,ಬೇಗ ಮಿಂದಿಕ್ಕಿ ಬಂದು ಕರೆ ಸ್ವೀಕರಿಸಿದವು.

      ತುರ್ತು ಕರೆಗೆ ಸ್ಪಂದಿಸಿ ಹೆರಟು ಹೋದವು.ಅಲ್ಲಿಗೆ ವೈದ್ಯ ಶ್ಯಾಮರಾಯರು ತಲುಪೆಕ್ಕಾದರೆ ಮೊದಲೇ..,ಗಂಗೆಜ್ಜಿ ಎಲ್ಲೋರಿಂಗೆ ವಿದಾಯ ಹೇಳಿ ಪರಲೋಕ ಯಾತ್ರೆ ಹೆರಟಿದು.

                  😭

✍️ ಅನಿತಾ ಜಿ.ಕೆ.ಭಟ್.
06-10-2020.
ಚಿತ್ರ: ಹವಿಸವಿ ಕೃಪೆ