ಸಂತೃಪ್ತ ಸೃಷ್ಟಿ

 

ಸಂತೃಪ್ತ ಸೃಷ್ಟಿ

ಇಲ್ಲೇನು ಮಾಡುವಿರಿ ಹೀಗೆ ಕುಳಿತು?
ಆಸರೆಯ ಕೊಡೆಯೊಳಗೆ ಮೆಲ್ಲ ಅವಿತು
ಕಾರ್ಮೋಡ ಮುಸುಕಿ ಕತ್ತಲು ಕವಿದು
ಕೆರೆಕೊಳ್ಳ ಬರನೀಗಿ ಒಡಲು ತುಂಬಿಹುದು||

ಕೈಲಿ ಹಿಡಿದಿಹ ಮಾರುದ್ದ ಗಾಳ
ಹೊಟ್ಟೆ ಹಾಕುತಿದೆ ಬಿಡದೆ ತಾಳ
ನಿತ್ಯವೂ ಬೆಂಬಿಡದ ಗೋಳು
ಮೀನು ದೊರೆತರೆ ಸುಖವು ಬಾಳು||

ಮುಂಗಾರು ಹನಿಯಾಗಿ ಸುರಿಯೆ
ಸೊಂಪಾದ ಧರಣಿ ಹಸಿರಸಿರಿಯೆ
ಹೊಳೆವ ಹಸಿಹುಲ್ಲ ಚಿಗುರು
ತಂಪಾದ ತಂಗಾಳಿ ಇನ್ನಿಲ್ಲ ಬೆವರು||

ಹೊನ್ನೀರ ಹನಿಯ ಸಿಂಚನ
ಮೈಯೆಲ್ಲ ಚಳಿಯ ರೋಮಾಂಚನ
ಹೊದ್ದು ಮಲಗಲಾರ ಈತ ರೈತನು
ಕಾಯಕಕೆ ಬದ್ಧ ನೀಗಿಸುತ ಹಸಿವನು||

ಕಾಲಕಾಲಕೆ ಬಂದರೆ ಮಳೆ
ರೈತನಿಗೆ ಸಮೃದ್ಧ ಬೆಳೆ
ಕೊಡೆಹಿಡಿದು ಗಾಳದತ್ತ ಏಕಾಗ್ರ ದೃಷ್ಟಿ
ಆಹಾರ ಸರಪಳಿಯಲಿ ಸಂತೃಪ್ತ ಸೃಷ್ಟಿ||

                      
✍️... ಅನಿತಾ ಜಿ.ಕೆ.ಭಟ್.
06-10-2020.

ಚಿತ್ರ ಕೃಪೆ :ಹವಿಸವಿ ಬಳಗ.