ಚೈತ್ರದ ಚಿಗುರಂತೆ ನಿನ್ನ ಸ್ನೇಹವು ಗೆಳೆಯ

ಚೈತ್ರ ತಂದ ಚಿಗುರಿನ ಹಾಗೆ ನಿನ್ನ ಸ್ನೇಹವು ಗೆಳೆಯ


ಬರದ ಛಾಯೆಗೆ ನಲುಗಿದ
ಬೆಂಗಾಡು ನಾನು
ಸೋನೆ ಮಳೆಯಂತೆ ಸೋಕಿ
ತಂಪೆರೆದೆ ನೀನು...||

ಹನಿಹನಿಗಳ ಲೀಲೆಗೆ
ಕೊರಡು ಕೊನರಿದೆ
ಇನಿಯನಿನ್ನ ಪರಿಧಿಯೊಳಗೆ
ತರತರದ ಸೊಗವಿದೆ...||


ಇದಿರು ನೋಡುತಲಿದ್ದೆ
ಮುದ್ದಿಸುವ ಕರಗಳನು
ಸದ್ದಿರದೆ ಆಗಮಿಸಿದೆ
ಹದ್ದುಮೀರದ ಜಾಣನು...||


ಪ್ರೇಮ ನೋಟಕೆ ಸೋತು
ಕದಿರೊಡೆದ ಒಲವು
ನೇಮನಿಷ್ಠೆಯ ಮರೆತು
ನಡೆಯದಿರೆ ಗೆಲುವು...||


ಚೈತ್ರತಂದ ಚಿಗುರಿನ ಹಾಗೆ
ನಿನ್ನ ಸ್ನೇಹವು ಗೆಳೆಯ
ಛತ್ರಿಯ ಪ್ರತಿಕೊನೆಗೂ
ನನ್ನ ಮೋಹವು  ಒಡ್ಡಿಕೈಯ...||


ಒಂಟಿಯ ಪಯಣದಲಿ
ಪಂಚಮದ ಇಂಚರ
ಜಂಟಿಯಾಗಿ ಸಾಗುತಲಿ
ನಮ್ಮ ಪ್ರೆಮವು ಅಮರ...||

ಮಾಮರದ ತುಂಬ ಕುಕಿಲ
ಚಿಗುರ ಮೆದ್ದು
ಇಂಪಾದ ಗಾನದಲಿ ಪ್ರೇಮ
ಲಹರಿ ಸದ್ದು...||

ನಿನ್ನೊಂದು ನಗೆಯಲ್ಲಿ
ನನ್ನ ಹಿಡಿದಿಡುವೆಯ ಗೆಳೆಯ
ನನ್ನೊಂದು  ಸೆರಗಲ್ಲಿ
ನಿನ್ನ  ಬೆಚ್ಚಗಿರಿಸುವೆ ಇನಿಯ...||


✍️... ಅನಿತಾ ಜಿ.ಕೆ.ಭಟ್.
15-03-2020.

ಚಿತ್ರ ಮತ್ತು ಶೀರ್ಷಿಕೆ ಕೃಪೆ:-ಕೊಡಗಿನ ಬೆಳದಿಂಗಳು ಫೇಸ್ಬುಕ್ ಗ್ರೂಪ್.