ಬಾಲ್ಯದ ಮೋಜು

ಹಾಳುಕೊಂಪೆ ಊರಿನಲ್ಲಿ
ಪಾಳುಬಿದ್ದ ಗುಡಿಸಲಲ್ಲಿ
ಕೀಳುಮೇಲು ಭೇದವಿರದೆ
ಬಾಳುತಿದ್ದ ಚಿಣ್ಣರು...||೧||

ಹಳೆಯ ಚಕ್ರ ಹುಡುಕಿ ತಂದು
ಎಳೆಯ ಬಿದಿರ ಕೋಲಕಟ್ಟಿ
ಬಳ್ಳಿಯೊಂದ ಬಿಗಿದು ಬಿಟ್ಟು
ಎಳೆದ ಎಳೆಯ ಬಾಲರು...||೨||

ಊರಬೀದಿ ತಿರುವು ತಿರುವಿನಲ್ಲಿ
ಬರಿಯ ಪಾದ ಮೆಟ್ಟಿ ನಡೆದು
ಭಾರಿ ಮೋಜು ಮಸ್ತಿ ಮಾಡಿ
ದರದರನೆ ಎಳೆದರು...||೩||

ತಾತನವನು ಮಕ್ಕಳೊಡನೆ
ಪ್ರೀತಿಯಿಂದ ಗೆಳೆಯನಾಗಿ
ಬಿತ್ತಿ ಸರದಿಯೆಂಬ ಶಿಸ್ತು
ಕಿತ್ತಜೋಡ ಹಾಕಿನಡೆದನು||೪||

ಬೆಲೆಬಾಳುವ ಆಟಿಕೆಗಳಿಲ್ಲ
ಕೀಲಿಬೊಂಬೆ ಕಂಡೇಯಿಲ್ಲ
ಜಾಲಿಯಾಗಿ ಎಳೆವಬಂಡಿ
ತೇಲಿ ಸಂತಸದ ಕಡಲಿನಲ್ಲಿ||೫||

ಬಾಳಿನಲ್ಲಿ ಸುಖವು ಎಂದೂ
ಕೇಳಿಕೊಂಡು ಬರುವುದುಂಟೆ?
ಕಳೆದುಹೋದ ಕೊರಗುಯೇಕೆ?
ನಾಳೆಯ ಚಿಂತೆ ಅತಿಯೇಕೆ..?||೬||

ನಾಲ್ಕು ದಿನದ ಬದುಕಯಾನ
ಬೇಕು ತೃಪ್ತಿ ಸಮಾಧಾನ
ಕೇಕೆಹಾಕಿ ನಗುತ ಸಾಗುವ
ನಕ್ಕು ನಲಿದು ಗೆದ್ದು ಬೀಗುವ...||೭||


✍️... ಅನಿತಾ ಜಿ.ಕೆ.ಭಟ್.
13-02-2020.

ಚಿತ್ರ ಕೃಪೆ-ಕನ್ನಡ ಕಥಾಗುಚ್ಛ.