ಶುದ್ಧ ಸ್ನೇಹ ಬಂಧ

ನಿಶೆಯು ತಬ್ಬಿದಾಗ
ಮನೆಯ ಕಾದ ಶುನಕ
ವಿಷಯ ಕೇಳಿದಾಗ
ಬೊಗಳಿ ಕಾವ ಕಾಯಕ||೧||

ಉಷೆಯ ಕಿರಣ ಸೋಕಲು
ಮುದುರಿಕೊಂಡು ಬೆಚ್ಚನೆ
ಒಡೆಯನೊಲುಮೆ ವಿಶ್ವಾಸವ
ತಾನು ಗೆದ್ದು ಬಿಮ್ಮನೇ||೨||

ಹಸಿದ ಗೆಳತಿ ಮಹಿಷಿ
ನಿಂತು ಹುಲ್ಲು ಮೇಯುತಿದ್ದಿತು
ಮೈಯನೇರಿ ಕುಳಿತ ನಾಯಿ
ಕ್ಷಣದಿ ನಿದಿರೆಗಿಳಿಯಿತು||೩||

ಕೊರಳಬಳ್ಳಿ ಬಿಗಿದುಕೊಂಡು
ಕೆಸರಿನಲ್ಲಿ ನಿಂತರೂ
ಮಿತ್ರನೆಂದು ಇವನು ತನಗೆ
ಕೊಡುತ ಮೈಯ ಆಸರೆ||೪||

ಹಗಲಿರುಳು ಊರ ಕಾದವಗೆ
ಕನಸಿನಲ್ಲು ಕೇಡುಬಗೆಯದು
ಎಮ್ಮೆಗೆ ನಾಯಿ ಭಾರವೇ
ನಿಷ್ಕಲ್ಮಶ ಮನಸಿರೆ||೫||

ಮಾದರಿಯು ಮನುಜಗೆ
ಎಮ್ಮೆ-ಶುನಕ ಶುದ್ಧಸ್ನೇಹವು
ಮತ್ಸರ-ಚಿಂತೆ ಬಿಟ್ಟವಗೆ
ಒಲಿಯುವಂತಹ ಬಂಧವು||೬||

✍️... ಅನಿತಾ ಜಿ.ಕೆ.ಭಟ್.
26-02-2020.

ಚಿತ್ರ ಕೃಪೆ : ಹವಿಸವಿ ಬಳಗ