ಬಿಳುಪಿನ ಹಲ್ಲು

ವಾಣಿಯು ದಿನವೂ
 ತರುವಳು ದುಡ್ಡು
ಅಪ್ಪನು ಕೊಡುವ
ಹತ್ತರ ಗರಿಗರಿ ನೋಟು... ಗರಿಗರಿ ನೋಟು||

ಶಾಲೆಯ ಪಕ್ಕದ
ಅಂಗಡಿ ಮುಂದೆ
ಗುಂಪಲಿ ನುಗ್ಗಿ
ಬಿಸ್ಕತ್ ಮಿಠಾಯಿ ತರುವಳು ಹಿಗ್ಗಿ...ತರುವಳು ಹಿಗ್ಗಿ||

ವೀಣಾಳು ವಾಣಿಯು
ಜೊತೆಯಲಿ ನಡೆಯೆ
ವೀಣಾಳ ಬಾಯಲಿ ನೀರು
ವಾಣಿಯು ಕೊಡಳು ಚೂರೂ...ಕೊಡಳು ಚೂರೂ||

ಅಮ್ಮನ ಬಳಿಯಲಿ
ವೀಣಾಳು ಅಳಲು
ಅಮ್ಮನು ಕಣ್ಣಲೆ ಗದರಿ
ವೀಣಾ ಹೋದಳು ಹೆದರಿ... ಹೋದಳು ಹೆದರಿ||

ಒಂದಿನ ಶಾಲೆಗೆ
ಬಂದರು ವೈದ್ಯರು
ವೀಣಾಳ ಬಾಯೊಳ ನೋಡಿದರು
ಚಂದದ ಹಲ್ಲನು ಹೊಗಳಿದರು...ಹಲ್ಲನು ಹೊಗಳಿದರು||

ಬಂದಿತು ವಾಣಿಯ ಸರದಿ
ಬಾಯಿಯ ಒಡೆದಳು ಆತುರದಿ
ಬಿಳುಪಿನ ಹಲ್ಲು ಇಲ್ಲವೇ ಇಲ್ಲ
ಕಪ್ಪಿನ ಹಲ್ಲು ಹುಳುಕೇ ಎಲ್ಲ...ಹುಳುಕೇ ಎಲ್ಲ||

ವೀಣಾಗೆ ದೊರಕಿತು ಚಪ್ಪಾಳೆ
ಬಿಳುಪಿನ ಹಲ್ಲಿಗೆ ಬಹುಮಾನ
ವಾಣಿಯ ಮೊಗದಲಿ ಇಲ್ಲ ಕಳೆ
ಕೆಡುಕಿನ ಹಲ್ಲೆಂದು ಅವಮಾನ... ಕೆಡುಕಿನ ಹಲ್ಲೆಂದು ಅವಮಾನ||

✍️... ಅನಿತಾ ಜಿ.ಕೆ.ಭಟ್.
24-11-2019.