ಜೋಕಾಲಿ ಆಡೋಣ ಬಾ ಅಳಿಲೇ

                     

ಮಗು:
ಪೊಟರೆಲಿ ಅವಿತಿರೋ ಅಳಿಲಣ್ಣ
ನನಗೂ ಜೊತೆಯಲಿ ಬರುವಾಸೆ
ಬಾಲವನೆತ್ತಿ ಮರವನು ಸುತ್ತಿ
ಛಂಗನೆ ನೆಗೆವ ಅಳಿಲಣ್ಣಾ||

ಅಳಿಲು:
ಹಕ್ಕಿಗೆ ಇಡುವರು ಆಹಾರ
ನನಗಿದುವೇ ಬಲು ರುಚಿಕರ
ಹಾರುವೆ ನಾನು ಬಲುದೂರ
ತಣಿಯಿತು ಈಗ ನನ್ನುದರ||

ಮಗು:
ನಾನೂ ನೀನೂ ಜೊತೆಯಾಗಿ
ಜೋಕಾಲಿ ಆಡುವ ಬಾ ಇಣಚಿ
ನಿನ್ನನು ಕೂರಿಸಿ ನಾನೇ ನೂಕಿ
ದಿನವಿಡೀ ನಲಿಯೋಣ ಕೇಕೇ ಹಾಕಿ||

ಅಳಿಲು:
ನಾನೇ ತುಂಟ ನೀನಾದರೆ ಬಂಟ
ಮುಗಿಯದು ನಮ್ಮ ಪುಂಡಾಟ
ಸಿಕ್ಕಿದ ಆಹಾರ ನಾನೇ ಮುಗಿಸಿ
ಹೆದರಿಸಿ ಹಕ್ಕಿಗಳ ಆಚೆಗೆ ಓಡಿಸಿ||

ಮಗು:
ಖುಷಿಖುಷಿಯಾಗಿ ಬದುಕಲು ಕಲಿಸು
ಸಮತೋಲನದ ನೀತಿಯ ತಿಳಿಸು
ನಿನ್ನಯ ಜಾಣ್ಮೆ ನನಗೂ ಬರಲಿ
ಬದುಕುವ ಛಲವು ನನ್ನಲಿ ತುಂಬಲಿ||

ಅಳಿಲು:
ಸ್ವಚ್ಛಂದದ ಬದುಕೇ ನನಗಿದು ಹರುಷ
ನಾಳಿನ ಚಿಂತೆ ಇಲ್ಲವು ನಿಮಿಷ
ಮೂರು ನಾಮದ ರಾಮನ ಬಂಟ
ರಾಮನಾಮದಿ ದೂರವು ಸಂಕಟ||


                  🐿️ 🐿️

✍️... ಅನಿತಾ ಜಿ.ಕೆ.ಭಟ್.
25-11-2019.