ಶಾಲಾ ವಾರ್ಷಿಕೋತ್ಸವದ ಸುದಿನ

ಕಾತರ ನಯನದಿ ಸುಳಿಮಿಂಚು
ತುಸುನಗುವ ತುಟಿಯಂಚು
ಅರಿತಿದೆ ಕ್ಯಾಮರಾದ ಹೊಂಚು
ಸೆರೆಹಿಡಿದಿಹರು ಭಾವವ ಇಂಚಿಂಚು....

ವೇದಿಕೆಯಲಿ ಗೆಳೆಯ ಗೆಳತಿಯರ
ಸಂಗೀತ ನೃತ್ಯ ಗಾಯನ ಯಕ್ಷಗಾನ
ತರಳೆಯರ ಸರದಿಗೆ ಆತುರ
ಸೂರೆಗೊಳಿಸಬೇಕು ಜನಪದ ನರ್ತನ....

ಅಮ್ಮನಂತೆಯೇ ಸೀರೆಯುಟ್ಟು
ಅಪ್ಪನಂತೆಯೇ ಝರಿಪೇಟತೊಟ್ಟು
ಅಜ್ಜನಂತೆ ಮೈಗೆ ಕಂಬಳಿ ಇಳಿಬಿಟ್ಟು
ಹಣೆಯನಡುವೆ ಶೋಭಿಸುವ ಬೊಟ್ಟು....

ಅಜ್ಜಿತೊಡುತಿದ್ದ ಕಾಸಿನ ಸರ
ಜತನದಿ ಪೋಣಿಸಿದ ಮುತ್ತಿನಹಾರ
ವದನದಿ ಹೊಳೆವ ವಿಶ್ವಾಸದ ಘಮಲು
ಹರಿಸೆ ಗ್ರಾಮ್ಯ ಸೊಗಡಿನ ಹೊನಲು....

ಶಾಲಾ ವಾರ್ಷಿಕೋತ್ಸವದ ಸುದಿನ
ಬನ್ನಿರೆಲ್ಲರು ಆನಂದಿಸಿ ನಮ್ಮ ಪ್ರದರ್ಶನ
ನಮ್ಮ ನಾಡಿನ ಸಂಸ್ಕೃತಿಯ ಪರಿಚಯ
ಸರ್ವರಿಗೂ ಉಣಬಡಿಸುವ ಸದಾಶಯ...


✍️... ಅನಿತಾ ಜಿ.ಕೆ.ಭಟ್.
25-11-2019.