ಮಗು ಶಾಲೆಗೆ ಹೊರಟಾಗ

ಅಮ್ಮಾ ನಾನು ಶಾಲೆಗೆ ಹೋಗುವೆ
ಬಣ್ಣದ ಪುಸ್ತಕ ಬ್ಯಾಗು ಛತ್ರಿಯ ಹಿಡಿವೆ
ಸಮವಸ್ತ್ರವ ತೊಟ್ಟು ಬೂಟನು ಸುರಿದು
ಶಾಲೆಗೆ ನಡೆವೆನು ನಿನ್ನ ಕೈಬೆರಳ ಹಿಡಿದು||

ತರಗತಿಯೊಳಗೆ ಕುಳಿತಿಹ ಚಿಣ್ಣಗೆ
ಮರೆತೇ ಹೋಯಿತು ಮುಗುಳುನಗೆ
ಅಮ್ಮಾ ನೀ ಕಾಯಲೇ ಬೇಕು ಹೊರಗೆ
ಅಕ್ಷರಲೋಕಕೆ ತೆರೆದಿಹ ಕಂದ ಒಳಗೆ||

ಅಮ್ಮನು ಮನೆಗೆ ಹೇಳದೆ ತೆರಳಿ
ಒಪ್ಪ ಓರಣ ಕಾರ್ಯದಿ ತೊಡಗಿ
ಅಮ್ಮಾಹಾಲುಹಣ್ಣು ಎನ್ನುತ ಕೂಗಿ
ಸೆರಗೆಳೆವ ಪುಟ್ಟನ ನೆನಪು ಮರಳಿ||

ಬೀಕೋ ಎನುತಿದೆ ಖಾಲಿಮನೆವಠಾರ
ಅಂತರ್ಯದಿ ಅಳುತಿದೆ ತಾಯ್ಮನವು
ಗೋಡೆಬರಹ ಚೆಲ್ಲಿದಆಟಿಕೆ ಉಣ್ಣದಹಠವು
ತಂಟೆಮಲ್ಲನೆಂದು ಗದರಿದ ಬೇಸರ||

ಬೇಗನೆ ಹೆಜ್ಜೆ ಹಾಕುತ ಶಾಲೆಯ ಕಡೆಗೆ
ಗಂಟೆಯು ಹೊಡೆಯುವ ಮೊದಲೇ ಕಾದು
ನಿಂದಳು ಅಮ್ಮ ಪುಟಾಣಿಯ ಬರುವಿಕೆಗೆ
ತಾಯಿಯ ಸೇರಿದ ಕಂದ ಸಾಲಲಿ ಬಂದು||

ನನ್ನ ಮುದ್ದಿನ ಶಿಕ್ಷಕಿ ಚಾಕಲೇಟ್ ನೀಡಿ
ಆಯಾ ಬಂದು ಪ್ರೀತೀಲಿ ಮಾತಾಡಿ
ನಮ್ಮನೆಲ್ಲ ಹಾಡನು ಹಾಡಿಸಿ ಕುಣಿಸಿ
ಬಳಪವ ಹಿಡಿದು ಬರೆದು ಓದಿಸಿ||

ಗೆಳೆಯರ ಬಳಗವು ಖುಷಿಯೆನಗೆ
ನನ್ನಯ ಶಾಲೆಗೆ ದಿನವೂ ಬರುವೆ
ಅಕ್ಷರ ಕಲಿತು ಜಾಣ ಮಗುವಾಗಿ
ಶಾಲೆಗೂ ನಿಮಗೂ ಕೀರ್ತಿಯ ತರುವೆ||

✍️... ಅನಿತಾ ಜಿ.ಕೆ.ಭಟ್.
25-11-2019.