ಮಗುವಿನ ಕೋರಿಕೆ

ಕಲ್ಲಾಗಿ ನಿಂತಿರುವ ಕರಿಯ ಆನೆ
ನಿಜ ಆನೆ ಕಂಡರೆ ಹೆದರುವೆನು ನಾನೆ
ದೇವಾಲಯದೊಳು ಕೈಮುಗಿದು ದೇವಗೆ
ಬೇಗನೆ ಬರುವೆನಾ ನಿನ್ನ ಬಳಿಗೆ||

ನಾನಿನ್ನು ತೆರಳುವೆ ಖುಷಿಯಿಂದ ಶಾಲೆಗೆ
ನಿನಗಿಲ್ಲಿಯೇ ನಿಲುವ ಶಿಕ್ಷೆ ಏಕೆ..?
ಆಟ ಪಾಠದಲಿ ನನ್ನ ಜಯಭೇರಿಗೆ
ನೀನೂ ಸಲಿಸುವೆಯಾ ದೇವನಿಗೆ ಕೋರಿಕೆ..?

ನಾ ಕೊಡುವೆ ನಿನಗೊಂದು ಸಿಹಿಮುತ್ತು
ಸ್ನೇಹ ಸಂಬಂಧದ ಕಾಣಿಕೆಯಿದು ಗೊತ್ತಾ..?
ಗಣಪಗೆ ನೀ ಕೊಟ್ಟಿರುವೆ ನಿನ್ನ ಶಿರವ
ಗುಣನಿಧಿಯೆ ನೀ ಕೊಡು ನನಗೆ ವರವ||

ನಾರಿಕೇಳವ ನಾ ನಿನಗೆ ಅರ್ಪಿಸುವೆ
ನನ್ನೊಡನೆ ಆಟಕೆ ನೀ ಬರುವೆಯಾ..?
ದಪ್ಪನೆಯ ಕಾಲುಗಳ ಬಳಿಯಲಿ
ಸುತ್ತಿ ಆಡುವಾ ಆಸೆ ಮನದಲಿ||

ಬರುವ ಭಕ್ತರಿಗೆ ನೀನು ಸ್ವಾಗತವ
ಕೋರುವೆ ತೋರದೆ ಭೇದಭಾವ
ಒಳಗಿರುವ ಪೂಜಾರಿ  ಕಾಣಿಕೆಯು
 ಸಿಗದೆ ಕೊಡಲಾರ ನನಗೆ ಅಪ್ಪ ಕಜ್ಜಾಯ||

ಹಣೆಕತ್ತಿನ ಚಿನ್ನದ ಅಲಂಕಾರ ಬಲು ಸೊಗಸು
ಅದಮುಟ್ಟಿ ನೋಡಿದರೆ ನೀ ತೋರೆ ಮುನಿಸು
ಬಿಳಿಕೋರೆದಂತ ಹೆಗಲಮೇಲಿನಪಟ್ಟೆ
ನೋಡಿ ನಾನೂ ಕೂಡ ಆಸೆಪಟ್ಟೆ||

ಕಾಯುತಿಹಳಲ್ಲಿ ನನ್ನ ಮಾತೆ
ನಿನ್ನ ನೋಡುತ ನಾನು ಮೈಮರೆತೆ
ದೇವನಲಿ ಬೇಡುವೆ ನಿನಗೂ ಕೊಡುಜೀವ
ಇದುವೇ ಪುಟ್ಟ ಮಗುವಿನ ಮನದಭಾವ||

                       

✍️... ಅನಿತಾ ಜಿ.ಕೆ.ಭಟ್.
25-11-2019.

ಚಿತ್ರ ಕೃಪೆ: ಕನ್ನಡ ಕಥಾಗುಚ್ಛ.