ಒಡಹುಟ್ಟು ಮುದ್ದು ಜೋಡಿ

ಜೊತೆಯಾಗಿ ನಡೆದು
ಹಿತವಾಗಿ ನುಡಿದು
ನಡೆದಿಹರು ಉಟ್ಟುಮಡಿ
 ಒಡಹುಟ್ಟು ಮುದ್ದುಜೋಡಿ...

ಮೆಲ್ಲ ಮೆಲ್ಲನೆ ಇಡುತಹೆಜ್ಜೆ
ಮೌನವಿರದು ಸವಿಮಾತು
ಬಿಳಿತುಂಡು ಬಟ್ಟೆಯ ಲಜ್ಜೆ
ಕಾಲಲ್ಲಿ ಘಲ್ಲೆನುವ ಗೆಜ್ಜೆ...

ಮನೆಯ ಪಕ್ಕದಿ ಹರಿವ ಹಳ್ಳ
 ನಿತ್ಯ ಈಜು ಸ್ನಾನದ ಕೊಳ್ಳ
ಅಮ್ಮ ಬರುವಳು ಬಟ್ಟೆಯೊಗೆದು
ಅಕ್ಕರೆಯಲಿ ಸಾಗಿಹರು ಕೈಯಹಿಡಿದು...

ಒಂದು ಕೈಯಲಿ ಒದ್ದೆ ಅಂಗಿ
ಇನ್ನೊಂದು ಆಸರೆ ಮುದ್ದು ತಂಗಿ
ಆಗಸದಿ ರವಿ ಮೋಡದ ಮರೆ
ನಿಂತು ಸೋಜಿಗದಿ ವೀಕ್ಷಿಸುತಿರೆ...

ಕಲ್ಲು ಮುಳ್ಳಿನ ದಾರಿಯಾದರೇನು
ಗೆಲ್ಲುವೆವು ಬಾಂಧವ್ಯವ ಭದ್ರಗೊಳಿಸಿ
ಬೆಲ್ಲದ ಸವಿಸಂಗ ನಮ್ಮೀರ್ವರೊಳಗೆ
ಒಲ್ಲದು ಮುನಿಸು ಬರಲು ನಮ್ಮಬಳಿಗೆ...

ಹಳ್ಳಿಗಾಡಿನ ಹಸಿರ ಸೊಬಗು
ಬಳ್ಳಿಯಾಗಿದೆ ಕಾಳಜಿಯ ಸೆರಗು
ಕನಸು ಕಂಗಳು ಚೆಲ್ಲುತಿಹ ಬೆರಗು
ಎಂದೆಂದು ಬಾಳಲಿ ತುಂಬಿರಲಿ ಮೆರುಗು...

                         👫🤼

✍️... ಅನಿತಾ ಜಿ.ಕೆ.ಭಟ್.
25-11-2019.