ಚಿಣ್ಣರ ಆಟ

               


ಹಳ್ಳಿಯ ಸೊಗಡಲಿ
ಬೆಳೆದಿಹ ಚಿಣ್ಣರು
ಆಟಕೆ ಪರಿವೆ ಇಲ್ಲಿಲ್ಲ...||

ಮಳೆಯೋ ಬಿಸಿಲೋ
ಕೆರೆಯೋ ತೊರೆಯೋ
ಆಟದ ಕೂಟವು ನಿಲ್ಲಲ್ಲ...||

ಹಸುರಿನ ಮರೆಯಲಿ
ಕೆಸರಿನ ಓಕುಳಿ
ಸುರಿಯುವ ಮೂಗಿಗೂ ಭಯವಿಲ್ಲ...||

ಮೈಯಲಿ ಬೆವರು
ಅಂಗಿಗೆ ಕೆಸರು
ಆದರೆ ಬಯ್ಯೋರು ಯಾರಿಲ್ಲ...||

ಅಪ್ಪನು ಹೊಲದಿ
ಅಮ್ಮನು ಗೃಹದಿ
ಲಗಾಮು ಹಾಕುವರಾರಿಲ್ಲ...||

ನೆರೆಕರೆ ಚಿಣ್ಣರು ಜೊತೆಯಲಿ
ಸೇರಿ ಆಡಿದ ದಿನಗಳ
ಮರೆಯುವಿರೇನು ...?

ನೆನಪಿನ ಪುಟದಿ
ಬರೆದಿಹ ಭಾವವ
ಮೆಲುಕು ಹಾಕಲು ಸಿಹಿಜೇನು...||

ಆಗ:
       
 ಹಮ್ಮಿಲ್ಲ ಬಿಮ್ಮಿಲ್ಲ
   ಸಂತೋಷಕ್ಕೆ ಎಣೆಯಿಲ್ಲ...
  ಸಿಕ್ಕಿದ್ದೇ ಮೃಷ್ಟಾನ್ನ
   ಜೊತೆಯಲಿ ಉಂಡರೆ ಸವಿಯೆಲ್ಲ....       

ಈಗ:
         
ಕೆರೆಯಿಲ್ಲ ..ತೊರೆಯಲಿ ನೀರೇ ಇಲ್ಲ
ಆಟಕೆ ಆಟಿಕೆಗಳೇ ಸಾಲುತಿಲ್ಲ...
 ರುಚಿಯಡುಗೆಯೂ ಸೇರುತಿಲ್ಲ
 ಜಂಕ್ ಫುಡ್ ಉದರ ಸೇರಿದ್ದು ಲೆಕ್ಕವಿಲ್ಲ..                 

ಮಕ್ಕಳು ರಜೆಯಲಿ ಬೆಳೆಯಲಿ
ಪ್ರಕೃತಿಯ ಮಡಿಲಲಿ
ಮಗುವಿನ ಮನದಲಿ
ಸಂಭ್ರಮ ಮೂಡಲಿ....||
                   
                   🏹🏂🏌️⛹️🏋️

✍️... ಅನಿತಾ ಜಿ.ಕೆ.ಭಟ್.
25-11-2019.