ಗದ್ದೆಯ ಸೊಬಗು

🌴 ಗದ್ದೆಯ ಸೊಬಗು🌴

ನಯನವರಳಿಸಿ ನಭವ ದಿಟ್ಟಿಸಲು
ಕಾರ್ಮೋಡಗಳ ಚಿತ್ರ ಸಾಲು ಸಾಲು
ಹಸಿರಕರೆಗೆ ಮೋಡ ಪನ್ನೀರ ಸುರಿಸಲು
ಭೂದೇವಿಯ ಮಡಿಲಿಗೆ ಹರುಷ ಹೊನಲು||1||

ಗುಡುಗು ಸಿಡಿಲ ಆರ್ಭಟಕೆ
ಮೋಡದ ಮರೆಯಲಿ ರವಿಯ ಇರುವಿಕೆ
ಭುವಿಯು ಬೇರನು ತಬ್ಬಿದೆ ಮರದ ಅಂದಕೆ
ರೈತ ಹೊರಟಿಹನಂತೆ ಹೊಲವ ಉಳಲಿಕೆ ||2||

ಜೋಡಿ ಎತ್ತು ಹೊಲವನುತ್ತು
ಬಿತ್ತುವನು ಗದ್ದೆಯಲಿ ಭತ್ತ
ಕೊಡುವನು ರೈತ ನಮಗೆ ತುತ್ತು
ಬೆಟ್ಟ ಗುಡ್ಡಗಳು ಸುತ್ತಮುತ್ತ ||3||

ಹಸಿರು ಪೈರು ಪ್ರಕೃತಿಯ ಐಸಿರಿ
ಸುತ್ತಿದೆ ಪಚ್ಚೆ ಮರಗಳ ವನಸಿರಿ
ಗದ್ದೆ ಬದುವಿನ ಕಾಲುದಾರಿ
ರೈತ ನಡೆವನು ಇಲ್ಲಿ ಪಾದವೂರಿ ||4||



ಇದು ಕೊನೆಯಿರದ ರಹದಾರಿ
ನೋಡಿ ನೇಗಿಲಯೋಗಿಯ ಶ್ರಮದ ಪರಿ
ಆಧುನಿಕತೆ ಸೋಕಿಲ್ಲ;ತೆರಳಿಲ್ಲ ಹೊಲವ ಮಾರಿ
ಬೆವರ ಸುರಿಸುವ ರೈತ ನಮಗೆಲ್ಲ ಮಾದರಿ ||5||

ತನ್ನ ಕುಂಚದಿ ಹಸಿರ ಚಿತ್ರ ಬರೆದಿಹ ರೈತ ಕಲಾವಿದ
ಹಸಿರ ಬೆಳೆಸಿ ನಾಡ ಉಳಿಸಿದ ಕೃಷಿಯ ಕೋವಿದ
ಬದುವಿನಲ್ಲಿ ನಡೆದು ನಡೆದು ತನ್ನ ಜೀವನ ಸವೆಸಿದ||6||

  🌴🌲🌴🌲🌴🌲🌴🌴

✍️...ಅನಿತ ಜಿ.ಕೆ.ಭಟ್.
11-05-2020.