ಬುಗುರಿ

ಬುಗುರಿಯ ಆಟ

ಗಿರಿಗಿರಿ ತಿರುಗುವ ಬುಗುರಿಯ
ಕಂಡು ಅರಳಿದೆ ಮಕ್ಕಳ ಮನಸು
ಹಿರಿಹಿರಿ ಹಿಗ್ಗಿದ ಪುಟಾಣಿ ಮನಸಲಿ
ತುಂಬಿದೆ ಬುಗುರಿಯ ಕನಸು...||೧||

ಚೂಪಿನ ತಳದಲಿ ಜೋಪಾನ
ಮಾಡಿದೆ ತನ್ನಯ ದೇಹ
ಪುಟ್ಟಗೆ ಜಾತ್ರೆಲಿ ಕೊಳಬೇಕೆಂಬ
ಆಸೆಯು ತೀರದ ಮೋಹ...||೨||

ಅಂಗೈಯಲ್ಲಿ ತಿರುವುವ ಗೆಳೆಯನ
ಕೈಗಳ ಮೇಲೆ ಬುಗುರಿಯ ನಾಟ್ಯ
ತಂಗಿಗೂ ಪುಟ್ಟಗೂ ಬುಗುರಿಯು
ಬಂತು ಮರೆತೇ ಹೋಯ್ತು ಪಠ್ಯ...||೩||

ಉದ್ದನೆ ದಾರದಿ ಭರದಿಂ ಎಳೆದು
ರಭಸದಿ ಬಿಟ್ಟನು ಪುಟ್ಟ
ಸುತ್ತಲು ತಿರುಗಿ ಜಗಲಿಯ ಕೆಳಗೆ
ಜಾರಿತು ಬುಗುರಿಯು ರಟ್ಟಿ...||೪||

ಪುಟ್ಟನ ಕಣ್ಣು ತುಂಬಿತ್ತು
ಒಂದೇ ಬುಗುರಿಯು ಎರಡಾಗಿ
ತಂಗಿಯು ನುಡಿದಳು ನನ್ನಯ
ಬುಗುರಿಲಿ ಆಡುವ ನಾವು ಜೊತೆಯಾಗಿ...||೫||

✍️... ಅನಿತಾ ಜಿ.ಕೆ.ಭಟ್.
09-05-2020.