ಒಂದು ಮೈಲಿಗಲ್ಲಿನ ಕಥೆ

🛤️ಮೈಲುಗಲ್ಲಿನ ಕಥೆ 🛣️

ನನ್ನನಿಲ್ಲಿ ನಿಲಿಸಿಹರು
ಎಪ್ಪತ್ತರ ದಶಕದಲ್ಲಿ
ಪುಟ್ಟ ಮಕ್ಕಳು ದಾರಿಹೋಕರು
ಕೂತು ದಣಿವಾರಿಸಿಕೊಂಡಿಹರಿಲ್ಲಿ....

ಮಳೆಚಳಿಬಿಸಿಲೆಂಬ ಭೇದವಿರದೆ
ಮಾರ್ಗದರ್ಶನ ಮಾಡುತಿರುವೆ
ಸುತ್ತ ಹಬ್ಬಿದ ಹಸಿರ ಸೆರಗಿದೆ
ಸ್ವಚ್ಛ ಮಂದಾನಿಲ ಸೂಸುತಿವೆ....



ಈ ಪಥದಿ ಸಾಗಿದ ಜೀವಿಗಳೆಲ್ಲ
ಸಾಗಿ ಗುರಿಯನು ಮುಟ್ಟಿವೆ
ನನ್ನ ನೆನಪಿನ ಪುಟಗಳೆಲ್ಲ
ಯಶದ ಭಾಷ್ಯವ ಬರೆದಿವೆ....

ಚಿಣ್ಣರಿಂದು ಮುದುಕರಾಗಿ
ಕಣ್ಣಸಾಧನ ತೊಟ್ಟು ನನ್ನ ಕಂಡರೂ
ನಾನು ಮಾತ್ರ ಯುವಕನಾಗಿ
ಮಿಂಚುತಿರುವೆ , ಒಂದು ಮತ್ತೆ ಬರೆದರೂ....

ಬಾಳ ರಹದಾರಿಯ ಮೆಲುಕು
ಹಾಕಿ ಒಂದು ಕ್ಷಣವಿಲ್ಲಿ ನಿಲ್ಲಿರಿ
ಹಳೆಯ ಸವಿನೆನಪ ಚಿಲಕ
ತೆಗೆದು ನನ್ನ ಮೈಯನೊಮ್ಮೆ ತಡವಿರಿ...

✍️... ಅನಿತಾ ಜಿ.ಕೆ.ಭಟ್.
11-05-2020.