ಪುಟ್ಟ ಮಲ್ಲಿ-ಶಿಶುಗೀತೆ/ ಮಕ್ಕಳ ಹಾಡು /ಅಭಿನಯ ಗೀತೆ

 

ಪುಟ್ಟ ಮಲ್ಲಿ-ಶಿಶುಗೀತೆ

ಪುಟ್ಟ ಮಲ್ಲಿ ಕಣ್ಣುಮುಚ್ಚಿ
ನಿಂತಿರುವೆ ಏತಕೆ
ಹಸಿರು ಹಾಸು ನೀಲಬಾನು
ಸೆಳೆವ ನೋಟಕೆ...||೧||

ಪುಟ್ಟ ಮಲ್ಲಿಗೆರಡು ಜುಟ್ಟು
ದಿರಿಸು ಚೆಂದಿದೆ
ಧರಣಿದೇವಿ ವರುಣನೊಸಗೆ
ಹೀರಿ ಚಿಗುರಿದೆ...||೨||

ಆಡಲೆರಡು ಕುರಿಯ ಜೊತೆಗೆ
ದೊಡ್ಡ ಬಯಲಿದೆ
ಹಸಿದ ಹೊಟ್ಟೆ ಬಿಳಿಯ ಟಗರು
ಹುಲ್ಲು ಮೇದಿದೆ...||೩||

ನಿನ್ನ ನಲಿವು ನೋಡದೇನೆ
ಕರಿಕುರಿಯು ಖೇದಗೊಂಡಿದೆ
ಕರವ ಸರಿಸಿ ಸಂಗ ಬಯಸಿ
ಆಡಿ ಕುಣಿಯಬಾರದೆ...||೪||

ದಣಿಯೆ ನೀನು ಮರವು ತಾನು
ನೆಳಲನೀವುದು
ಮೋಡದಾಚೆ ರವಿಯು
ಅಡಗಿ ನೋಡುತಿರುವನು...||೫||

ಪುಟ್ಟ ಮಲ್ಲಿ ಬೇಡವಿಲ್ಲಿ
ಅಳುಕು ಅಂಜಿಕೆ
ಚಂದಮಾಮ ಬರುವನೀಗ
ತಾರೆ ತೋಟಕೆ...||೬||

ಬರಿಯ ಕಾಲು ಹುಲ್ಲು ಮುಳ್ಳು
ಮೆಟ್ಟಿ ಜಿಗಿಯಲಿ
ಅಮ್ಮ ಬರಲು ಕುರಿಯ ಕೂಡಿ
ಮನೆಗೆ ಸಾಗಲಿ...||೭||

ಪ್ರಾಣಿ ಪ್ರೀತಿ ಪೊರೆವ ರೀತಿ
ಮಲ್ಲಿ ತಿಳಿಯಲಿ
ನೆನಪ ಸಂಚಿ ತುಂಬಿಕೊಳಲಿ
ಬಾಳಬಯಲಲಿ...||೮||

✍️.. ಅನಿತಾ ಜಿ.ಕೆ.ಭಟ್.
19-08-2020.
ಚಿತ್ರ ಕೃಪೆ: ಕನ್ನಡ ಕಥಾಗುಚ್ಛ

ಈ ಗೀತೆಯನ್ನು ಯೂಟ್ಯೂಬ್ ನಲ್ಲಿ ಕೇಳಲು ಕೆಳಗಿನ ಲಿಂಕ್ ಬಳಸಿಕೊಳ್ಳಬಹುದು.

.https://youtu.be/8JNebLj48ZA