ಶ್ರಾವಣ ಸಂಭ್ರಮ

              ಶ್ರಾವಣ ಸಂಭ್ರಮ

             

ಶ್ರಾವಣ ಮಾಸದಲಿ ನವವಧುವಿನ ಸಂಭ್ರಮ, ಸಡಗರ 

                       💐💐

ಧರೆಯಲಿ ಶ್ರಾವಣ|ಹಸಿರಿನ ತೋರಣ|

ಹಬ್ಬದ ಹೂರಣ ಸಾಲಾಗಿ||

ತವರಿಲಿ ನವವಧು|ಸಖನನು ಕಾಣಲು

ನಾಚುತ ಕೆನ್ನೆಯು ಕೆಂಪಾಗಿ||೧||

ವಿರಹವು ಕಳೆದು|ಹರುಷವು ತಳೆದು|

ಪಂಚಮಿ ಹಬ್ಬದ ಸಂಭ್ರಮದಿ||

ತನಿಯನು ಎರೆದು|ಭ್ರಾತೃ ಪ್ರೇಮವ ಮೆರೆದು

ಸವಿಭೋಜನಗೈದರು ಸಂತಸದಿ||೨||

ಮಂಗಳಗೌರಿ ವರ|ಮಹಾಲಕುಮಿ ಶಿವನ

ವ್ರತದಲಿ ಶ್ರದ್ಧಾಭಕ್ತಿ ಸಡಗರವು||

ಕೈಬಳೆ ಕಿಣಿಕಿಣಿ|ಇನಿಯನ ಕಣ್ಮಣಿ

ಕಣಕಣದಲಿ ನವಚೇತನವು||೩||

ಅರಳುವ ಸುಮಗಳು|ಮೇಳೈಸಿದೆ ವನಸಿರಿ|

ಮೋಡದ ತುಂತುರು ಕಂಪಿನಲಿ||

ಬಗೆ ಬಗೆ ಉಂಡೆ|ನೈವೇದ್ಯವ ನೀಡಿ|

ತೂಗುತ ಶ್ರೀ ಕೃಷ್ಣನ ತೊಟ್ಟಿಲಲಿ||೪||

ಅಣ್ಣತಂಗಿಯ ಬಂಧ|ಸವಿನೆನಪನು ಬೆಸೆಯಿತು|

ಬಂದಿಹ ರಕ್ಷಾಬಂಧನವು||

ತಾಂಬೂಲವ ಮೆಲ್ಲುತ|ಕೃಷಿ ಖುಷಿ ಬಯಸುತ|

ಅರಳಿದೆ ಗರತಿಯ ಮೈಮನವು||೫||

✍️ ಅನಿತಾ ಜಿ.ಕೆ.ಭಟ್.

06-08-2020.