ಸಪ್ತ ಗಣಪತಿ ಸ್ತುತಿ
ಮಂಗಳಮಹಿಮನೆ ಏಕದಂತನೆ
ಗೋಡೆಯಲುದಿಸಿದ ಗಜಮುಖನೇ
ಮಧುವಾಹಿನಿಯ ತೀರದಿ ನೆಲೆಸಿದ
ಮಧೂರ ಗಣಪಗೆ ಮೊದಲ ವಂದನೆ||೧||
ವಿಘ್ನವ ಸರಿಸಿ ನಮ್ಮನು ಹರಸಿ
ಕುಮಾರ ಸೋದರ ಸ್ವಯಂ ಪ್ರಭಾಕರ
ಕೂಡುವೆ ಕರವ ಬೇಡುವೆ ವರವ
ಶರವು ಮಹಾಗಣಪನೆ ನಿತ್ಯವಂದನೆ||೨||
ಬಯಲೇ ಆಲಯ ಕಿರಣವು ರವಿಯ
ಸುರಿವನು ವರುಣ ತಾಳುವ ಗಜಕರ್ಣ
ವಿದ್ಯಾಬುದ್ಧಿಯ ಸಿರಿಸಂತಾನವ
ಕರುಣಿಪ ಸೌತಡ್ಕ ಗಣಪಗೆ ಕೋಟಿವಂದನೆ||೩||
ಕುಂಭಾಸುರನ ಸಂಹಾರಕೆ ಗದೆಯ ವರವಿತ್ತ
ಲಂಬೋದರನೇ ವರದಹಸ್ತನೇ
ಕೃಪೆದೋರಿ ಮುನ್ನಡೆಸು ಕೃಷ್ಣಪಿಂಗಾಕ್ಷನೇ
ಕುಂಭಾಶಿ ಗಣಪನೇ ಮೊರೆಯಿಡುವೆನು||೪||
ವರಾಹಿ ತಟದ ಜಟಾಧಾರಿಯೇ
ಮೋದಕಪ್ರಿಯನೇ ಸಂಕಷ್ಟಹರನೇ
ದ್ವಿಮುಖ ಗಣಪನೇ ಸಿಂಹಗಣಪನೇ
ಶಿರಬಾಗುವೆ ಹಟ್ಟಿಯಂಗಡಿ ವಿನಾಯಕನೇ||೫||
ದ್ವಿಭುಜ ರೂಪನೇ ಪದ್ಮಪ್ರಿಯನೇ
ಮೋದಕ ಹಸ್ತನೇ ಬಾಲಗಣಪನೇ
ನಿತ್ಯದ ಕಾರ್ಯಕೆ ನೀಡುವೆ ರಕ್ಷಣೆ
ಕಾಪಾಡು ಇಡಗುಂಜಿ ವಿನಾಯಕನೇ||೬||
ಬ್ರಹ್ಮಾಚಾರಿಯ ರೂಪದ ಗಣಪನೇ
ಕರದಲಿ ಲಿಂಗವ ಪಿಡಿದ ಭಾಲಚಂದ್ರನೇ
ಭೂಕೈಲಾಸದಿ ನೆಲೆಸಿದ ವಿದ್ಯಾಪತಿಯೇ
ಶರಣಾಗಿ ನಿಂದಿಹೆ ಗೋಕರ್ಣ ಗಣಪನೇ||೭||
ಸಪ್ತಗಣಪತಿಯ ಸ್ತುತಿಸುವೆ ಅನುದಿನ
ಸನ್ಮತಿ ನೀಡುವ ಮೂಷಿಕ ವಾಹನ
ಬೇಡುವ ಭಕ್ತರಿಗೆ ಅಭಯದಾಯಕ
ಬಿಡದೆ ನೀ ಪೊರೆಯೋ ದೀನ ರಕ್ಷಕ||೮||
🙏
✍️... ಅನಿತಾ ಜಿ.ಕೆ.ಭಟ್.
🙏🙏🙏
ReplyDeleteಥ್ಯಾಂಕ್ಯೂ 💐🙏
Delete